په کوټ کې د “د ولسونو په پرمختګ کې د ژبې او ادبياتو رول” تر سرليک لاندې غونډه وشوه

راپور: قدرت الله جاهد

د جمعيت اصلاح د ننګرهار ولايت د کوټ سيمه ييز دفتر د جمعې په ورځ د جدي په ۹مه نيټه د (د ولسونو په پرمختګ کې د ژبې او ادبياتو رول) تر سرليک لاندې غونډه وکړه. د غونډې ګډونوال د سيمې فرهنګپال، شاعران او اديبان ول.

غونډه په ټاکل شوي وخت د سهار په ۹ بجو د کوټ په مرکزي دارالحفاظ کې د استاد بهرام له خوا د قران کريم په تلاوت پېل شوه. په پېل کې د کوټ د دفتر مسؤل ډاکټر صاحب محمد شکر وحدت ګډونوالو ته د جمعيت اصلاح د اهدافو او فرهنګي خدمتونو يادونه وکړه. ډاکټر صاحب د خپلو خبرو  په ترڅ کې وويل چې فرهنګي خدمتونه جمعيت اصلاح خپل کار کڼې، که هغه هر څوک کوي زموږ د کار يوه برخه ده او موږ پرې خوښېږو.

ورپسې د جمعيت اصلاح د ننګرهار ولايت د ځوانانو مسؤل محمد ګلاب توحيديار د (اسلام او فرهنګي ادبي فعاليتونه) تر عنوان لاندې خبرې وکړې چې په لړ کې يې د مسلمانانو له خوا په شويو فرهنګي، ادبي او سياسي فعاليتونو رڼا واچوله. نوموړي د افغان سيد جمال الدين، شهيد امام حسن البنا، مولانا سيد ابو الاعلی مودودي (رح) او د افغانستان د اسلامي تحريک مخکښ شهید منهاج الدین ګهیځ د رسنيزو فعاليتنونو او کلتوري خدمتونو يادونه وکړه.

د غونډې په پای کې د سيمي فرهنګپال ښاغلي رحمان الله رښتين د کوټ ولسوالۍ د ادبي بهير په اړه وينا واوروله. د يادونې وړ ده چې د غونډې په جريان کې د سيمې راغليو شاعرانو خپل شعرونه ګډونوالو ته واورول. غونډه د سهار په ۱۱:۳۰ بجو د مولوي صاحب سيد هاشم په دعا پای ته ورسېده.

جمعيت اصلاح د ټولنې له منځ څخه راټوکېدلی ارګان دی چې د هېواد په بېلابېلو ولايتونو کې خپل پراخه ديني او کلتوري فعاليتونه کوي او هدف يې د فرد، کورنۍ او ټولنې اصلاح دی.

No related posts.