د شاتو مچۍ په قرآن کې

ژباړه: اوستا رب د شاتو ښځینه مچۍ ته وحی وکړه چې په لوړو غرونو او ونو کې کورونه جوړکړي، له ټولو میوو نه وخوري او د الله جل جلاله پر لار روان شئ. د هغوی له مینځه به د څښلو د بېلابېلو رنګو درلودونکي توکي راووځي چې په هغو کې به د انسانانو لپاره شفا وي او په هغو کې د هغو لپاره هم نښې شته چې فکر کوي.  (النحل ۶۸-۶۹).

د شاتو د مچیو په ټولي کې د هر یوه د نده ځانګړې ده. نارینه مچۍ د ملکې د القاح پرته بل کار نه کوي. او ښځینه مچۍ ټول کارونه لکه د کور او د انګبینو د کندو جوړول، پاکونه، د خوړو د توکو راټولول، د انګبینو جوړول او نورې چارې په غاړه لري. دغه مچۍ سره له دې چې ښځې دي خو زېږول نه کوي یعنې د تخمې د پخېدو ظرفیت نه لري او یواځې یوه یې دا توان لري چې هغه ملکه ده.

پدې آیت کې د شاتو مچیو ته د ښځینه خطاب شوی ځکه د “ان تخذي” فعل مؤنثې صیغې لپاره کارول شوی بیا نو قرآن دا روښانه کوي چې د شاتو جوړونکې ښځېنه مچۍ دي.

د دغې موضوع وضاحت په داسې حال کې چې د پوهې کچه ډېره ټیټه وه په خپله د قرآن یوه معجزه ده.

بیاهم پورته یادو شویو آیتونو ته پام اړوو ( شات دانسانانو لپاره شفا ده) په نني ساینس کې د انګبینو دخواصو مطالعې یوه نوې علمی شعبه پرانستې ده.

دا چې  کاربوهايدرونه یا  په شاتو کې موجود قند سره له دې چې د تېزابو ډېره کچه لري په آسانی سره ګلوکوز ته اوړیدلای شي، خو په ډیرو حساسو معدو کې هم په آسانۍ سره هضمېدلای شی. شات د پښتورګو او کولمو دندې ښې کولای شي.

کله چې شات له شیدو او اوبو سره وخوړل شي د دوو دقیقو په ترڅ کې یعنې په ډېرې چټکۍ سره د وینې بهیر ته ننوځي. د شاتو قند د دماغ دندې ښې کوي، او شات د ګلوکوز او قندونو ښه طبیعي فرکتوز شمېرل کېږی. نوې څېړنې جوتوي چې دغه ماده د ستړیا د له مینځه وړلو او د جسمي ځواکمنۍ لپاره ښه مخلوط دی.

شات د وینې د جوړیدو لپاره ښه غذایي مواد برابروي، برسېره پر دې د وینې په تصفیه کې هم مرسته کوي. او د وېنی پر دوران یی مثبتې اغېزی جوتې شوي. د رګونو د کلکوالي مخنیوی کوي. شات د مکروبونو د وژلو توان لري او دلیل یی هم دا دی چې شات ډیر قند لري او دغه قند د هغو اوبو د له مېنځه تلو لامل دی چې د مکروبونو وده مساعدوي، د شاتو تیزابیت او د نایتروجنو نه درلودل چې د مکروبونو د تکثر لپاره مهم عنصر دی د هغو بله ځانګړنه ده. په شاتو کې د هایدروجن پراکساید شتون هم د مکروبونو د تکثر مخنیوی کوی.

انتى اوکسيدانت Antioxidan  مواد د روغ ژوندانه لپاره ډیر اړین دي. هغه زیان لرونکي مواد چې د حجرو په میتابولیزم کې شته له مینځه وړي. انتی اکسیدانتونه د خوسا خوړو له تخریبي اغېزې نه مخنیوی کوي او له مزمنو ناروغیو نه هم مخنیوی کوی.

شات د بی او سی له ویټامینونو برسېره مگنيزيم, کلسيم, سوډيم, کلورين, سلفر, اوسپنه, فاسفورس, آيودين او جست هم په ډیره کچه لري.

کله چې په ټپونو باندې شات کېښودل شی،  د هوا لمدبل ځان ته راکاږي د جوړیدو بهیر چټکوي، ځکه چې شات د پوستکي د مخ د حجرو تکثر تحریکوي چې د ټپ د پوښ لامل ګرځي او ان چې په سترو ټپونو کې هم ګټور ثابت شوي.

- شات د التهاب ضد ځانګرتیا لري یعنې چې د ټپ د شاوخوا پړسوب کموي، د وینې بهیر یې سموي او رغونه چټکوي.

- شات د ټپ په ځای کې پر انساجو نه نښلي، له همدې کبله د پانسمان د بدلېدوپه وخت کې ناروغ درد نه احساسوی او نوی انساج جوړېږي او بیا نه تخریبیږی.

- شات د ټپ له منتن یا میکروبی کیدو نه مخنیوی کوي. او ټپ په ریم کې له شته مکروبونو نه ژر پاکوي. ان پر هغو مکروبونو چې د انتی بیوتیک په وړاندې یې مقاومت موندلی وي هم اغېزه کوي.

- داکتر پيتر مولن د نیوزیلاند د پوهنتون د بیوشیمی پوهاند وایي: تجربو ښودلې چې شات د سپینو زرو د مرکباتو نه چې  د سوزیدو په درملنه کې ګټور وي هم اغیزمن وي.

نو وینو چې شات داسې ګتورې ځانګړنې لري چې له شک پرته ویلای شو ډېرې عجیبې دی او دا د الله د صنعت د اعجاز یوه بېلګه ده.