زيتون په ښځو کې د سرطان مخه نيسي

 د داخلې طب څېړنې ښيي هغه مېرمنی چې زیتون خوری لږ د سرطان په ناروغۍ اخته کېږی. دغه راز په زیتونو کې داسې ماده هم شته چې د پروستات له سرطان څخه مخنیوی کوی.

 ژباړه: شفيق حقپال*

زيتون داسې خواړه دي چې په قرآن کې يې يادونه شوې. او د دې تر څنګ نني ساينس ثابته کړې چې زيتون پدې برسېره چې يو ډول خوندورو خواړه دي د روغتيا لپاره يوه ګټوره منبع ده.
 د التين په سورت كې الله جل جلاله په زيتونو قسم ياد كړى (والتين والزيتون) ژباړه: قسم په اېنځرو او زيتونو.
همدارنګه د نور د سورت په ۳۵ آيت کې د زيتون غوړو ته د مبارک خطاب شوی (يوقد من شجرة مباركة زيتونة) ژباړه: د زيتون له مبارکې ونې نه روښانه شوی.
په قرآن كې زيتون ته د “مبارک” کلمه كارول د زيتونو د تبرك او سپېڅلتيا ښكارندويي كوي. د زيتونو غوړي سره له دې چې د خوړلو يو ډول ښه غوړي دي نورې ډېرې ګټې هم لري چې ځينې يې دا دي:

د زړه ناروغۍ كموي
د زيتونو غوړي له کلسټرولو خالي دي او نه يواځی دا چې د بدن کلسټرول لوړېدو ته نه پرېږدي بلكې كنټرولوي يې هم، پدې سربېره زيتون اوميګا ۶ هم لري. څېړنو ښودلې کله چې يو څوک د ورځې يواځې دوه کاچوغې د زيتونو غوړ وخوري نو په وجود کې به يی زيان رسوونکي کلسټرول کم وي اوانتي اوکسيدايتونه به ډيروي.
زیتون د اومیګا ۳ او اومیګاه ۶ تناسب ساتی چې د بدن لپاره اړين دى او له هغه پرته به انسان د زړه په ناروغۍ، سرطان اونورو اخته شي.
د امریکې د زړه انجمن توصیه کوي چې د زیتونو د غوړو خوړل داسې دي لکه چې په خوړو کې د غوړو کچه راټیټه کړي اود زړه ناروغی هم لږې کړي.

 د ښځو د سرطان مخنيوى كوي
د داخلې طب څېړنې ښيي هغه مېرمنی چې زیتون خوری لږ د سرطان په ناروغۍ اخته کېږی. دغه راز په زیتونو کې داسې ماده شته چې د پروستات له سرطان څخه مخنیوی کوی.
د اکسفور د پوهنتون څېړنو ښودلی چې زیتون د کولمو د سرطان مخنیوی هم کولای شي. زیتون د معدې د اسیدونو سره تعامل کوي او د سرطان مخنیوی په لومړی وخت کې کولای شی. دغه راز دا موندل شوي چې زیتون صفرا لږوي او د دای امین اوکسیدیز انزایم ډیروي چې دا په ښه توګه د سرطاني حجرو مخنیوی کوی.

د مفصلونو د پړسوب مخه نيسي
هغه څوک چې د زیتونو غوړ خوری د مفصلونو د التهاب په ناروغیو نه اخته کېږی.

هډوکو ته وده وركوي
په شحمو کې د ګډو شویو ویټامینونو لکه اي، ډي، اې، او كې د هډوکو د ودې لپاره اړین دي. د زیتونو غوړي په ډیر عمرلرونکو کسانو کې ژر جذبېږی او د هډوکي د کلسیم د ضایع کیدو مخنیوی کوی نو زیتون د اسکلیټ په کلکوالی هم ښه اغېزه کولای شی.

 ځواني اوږدوي
دا چې په زیتونو کې شته ویټامینونه د حجرو په بیا جوړیدو کې مثبته اغېزه لري نو پوستکی تازه ساتی او د زړښت مخنیوی کوی. په زیتونو کې د ډیر انتی اوکسیدانت د شته والي له کبله هم د خوړو د موادو د استقلاب مخنیوی کیږی او هم د بدن د انساجو د زړښت او بوډاتوب مخنیوی کوی. په زیتونو کې دویټامین اي د شته والي له کبله د بدن د حجرو له خرابیدو څخه مخینوی کېږی.

ماشومان ژر غټوي
اوميگا 6 د ماشومانو د روغتیا او ودې لپاره ډیر ښه خواړه دي. په زیتونو کې د شحمی اسیدونو شته والی د حجروي غشا په جوړیدو کې مرسته کوي.
د زیتون غوړي ډیر متوازن شحم چې نامشبوع وی لکه شیدې په ځان کې لري له همدې کبله د شېدې خوړونکو لپاره ډیره ښه خواړه ګڼل کېږی. د امیدوارۍ په بهیر کې د ماشوم د اعصابو د ودې لامل ګرځي، د امیدواره میندو لپاره یی د خوړو توصیه کېږی. که چېرې د زیتونو غوړي د غواله شیدو سره چې پېروی یې ټول شوی وی یوځای شی د مور د شېدو په ځای ترې ګټه اخستلای شو.

د وینې فشار كموي
د داخلې طب آرشیف په ۲۰۰۰ میلادي کال کې د زیتونو پر دې اغېزو پوه شو او هغه یې مطالعه کړی دی.

له دې ټولو ښېګڼو سره زيتون د بدن د ننه غړو لپاره هم ځينې ګټې لري.
د زیتونو غوړي د ګېډې د پړسوب، ټپ او تیزابي کیدو مخنیوی کوي. د صفرا کیفیت ښه کوی، د صفرا بهر وتل اسانوي او د صفرا ډبرې مخنیوی کوی. په هغه کې د موجودو کلورایدو له امله ځیګر سره مرسته کوي چې له بدن څخه زیان لرونکی مواد دفع کړي. پردماغي شریانونو هم مثبته اغېزه کوي د ګلوكوز له کنټرول سره مرسته کوي او د شکرې ناروغۍ مخنیوی کوي.
پدې ډول پوهان په خوړو کې د زیتونو د زیاتولو توصیه کوی او پدې باور دي چې زیتون باید دهروخوړو اساسی برخه وی.

* شفيق حقپال کابل ميشتى ليکوال دى.

No related posts.