جاپانی ساينسپوه: د زمزم اوبه بې ساري دي

د جاپان د يوه ستر ساېنس پوه، ډاکټر مسارو اېموټو، د څېړنو له مخې په زمزم اوبو کې داسې ځانګرتياوې شته چې د نړۍ پرمخ په نورو اوبو کې بېخي نه ليدل کېږي. نوموړي دا ډول څېړنې د نينوټامي ټکنالوژۍ په مرسته ترسره کړي. دغو څېړنو ښودلې چې که د زمزمو يو څاڅکى په زر څاڅکو عادي اوبو کې واچول شي نو دا ټولې اوبه د زمزم خواص خپلوي.

ډاکټر ايموټو په جاپان کې د هيډو د څېړنيز مرکز مشر دى چې اوس د سعودي عربستان په دوره بوخت دى. نوموړي په خپل يو لېکچر کې ويلي دي چې په چاپان کې يې زمزم له يوه عرب مسلمان څخه لاسته راوړې وې چې وروسته يې پرې د ده په وينا يو لړ څېړنې ترسره کړې.

دغو څېړنو وښودله چې د زمزم اوبو د بلور (يو ځلا لرونکى معدني جوهر) جوړښت د عادي اوبو له هغه څخه خورا ډېر توپير لري. د دې ساينس پوه د څرګندونو له مخې په نړۍ کې هېڅ ډول اوبه زمزم اوبو ته ورته نه دي.

 نوموړي د يوه لابراتواري ازمېښت په مرسته معلومه کړې چې د زمزم اوبو د ځانګړتياوو بدلول له امکانه لري دي او نننى ساينس يې هم د لامل له ښکاره کولو څخه عاجز دى. يو بل ازمېښت چې د دې څېړنو په اوږدو کې تر سره شو دا دى چې د زمزم اوبو له ريسايکلينګ (د اوبو تبخيرول او بېرته پر اوبو بدل) وروسته هم د زمزم اوبو د بلور په جوړښت کې کوم تغير رانغى.

د يو لړ نورو څېړنو له مخې جاپاني ساينسپوهانو دا په ډاګه کړې چې پر اوبو تر بسم الله ويلو وروسته په اوبو کې يو حيرانوونکى بدلون راځي. د يوې لابراتواري تجربې له مخې لومړى يوه اندازه اوبه تر يوه پرمختللي مايکروسکوپ لاندې وکتل شوې او بيا پر همدغو اوبو د يوه مسلمان لخوا بسم الله وويل شوه. دا اوبه چې بيا تر مايکروسکوپ لاندې وکتل شوې، د اوبو پخواني بلورونه په ډېرو ښکليو بلورونو بدل شوي ول.

دغو ساينسپوهانو په اوبو يوه بله څېړنه هم کړې. هغه دا چې د يوه مسلمان له خوا يې پر يوه اندازه اوبو د قرآن کريم د آيتونو له تلاوت وړاندې او وروسته لابراتواري ازمېښت کړى چې د اوبو په ماليکولي جوړښت کې عجيبه بدلونونه تر سترګو شوي.

د دې ساينسپوهانو په وينا په اوبو کې هېښوونکې ځانګړنې شته. څېړنو ښودلې چې اوبه د اورېدو، احساسولو، ياد ساتلو او له چاپېريال سره د خپلو خواصو بدلولو وړتيا لري.

که پر اوبو د قرآن کريم آيتونه تلاوت شي، نو پکې د بېلابېلو ناروغيو د علاج وړتيا هم راپيدا کېږي. د دې تر څنګ اوبه د چاپېريال له بدلون سره ځان بدلولاى شي.

ډاکټر ايموټو دا هم ويلي چې د زمکې پر مخ ټول ساکښ او بې ساه مخلوقات له چاپېريال څخه اغېزمنېدلاى شي. د ده په وينا د کايناتو هره ‌ذره شعور لري چې له همدې امله ټول د خپل خالق په ثنا او صفت بوخت دي.